മഞ്ഞചെമ്പകം മണക്കുന്നു

മഴ ..
മരിച്ചുപോയ സ്നേഹിത
മഴത്തുള്ളിയില്‍  ഒളിച്ചു വന്നു ..
ആകാശത്തെ മാലാഖമാരെ പറ്റിച്ച്,
അവള്‍ പൊട്ടിച്ചിരിച്ചു.
പഴയ പടി .
ജലത്തുള്ളി പോലെ തെളിഞ്ഞ ആത്മാവ് ,
ചെമ്പകപ്പൂക്കളുടെ മണം  തന്നു ..
അവള്‍ക്കു ശേഷവും ഇരുട്ട്
മഞ്ഞചെമ്പകം മണക്കുന്നു................

കൃത്യതയുടെ താളം

ഞാനെപ്പോഴും വിഡ്ഢിയാകുന്നു ,
ഞാനുള്ളിടമൊക്കെയും എന്‍റെതെന്നു...
ഒക്കെയും വെറുതെയാകുന്നു ....
കടന്നുപോകുന്നവര്‍,
ഇടക്ക് കൂടിമുട്ടുന്നവര്‍ ,
നിത്യക്കാഴ്ച കൊണ്ടുമാത്രം
ഒരു ചിരി തരാന്‍ മറക്കാത്തവര്‍ ,
എന്നും അപരിചിതത്വം കാക്കുന്നവര്‍ ..
തിരക്കാണ്..
ഒഴുക്കാണ്..
ഒരു താളം സുക്ഷിക്കുന്നത് നല്ലതാണ്‌..
എങ്ങുമെങ്ങും നിശ്ചലമാവാതെ ,
ആരെയുമാരെയും കൂട്ടിമുട്ടാതെ ,
ഒരുവാക്കുകൂടി അധികമായി പറയാതെ ,
ഒരു ചിരികൂടി വെറുതെ പകരാതെ ,
കൃത്യതയുടെ താളം .

എനിക്ക് കൊതി തോന്നുന്നു ,ഒരു മഴ നനയുവാന്‍

ഓര്‍മകളുടെ ക്ലാവ് പാത്രം
ആരോ പുളിയിട്ടുരക്കുന്നു ..
ഒരു മഴ നനയാന്‍ മാത്രം എനിക്ക് കൊതി തോന്നുന്നു ..
എത്ര ജനിമൃതികളുടെ ഋതുക്കള്‍ ,
എത്ര വേനലുകളുടെ വെയില്‍,
എന്ത് ദൂരങ്ങള്‍ ..
കാറ്റിന്‍റെ വേഗം കൊണ്ടുപോയ
കരിയിലകളുടെ തേങ്ങല്‍ എനിക്ക് കേള്‍ക്കാം
കാതങ്ങള്‍ക്കപ്പുറത്തുനിന്ന് പേര് ചൊല്ലി വിളിപ്പതാരെന്നറിയാം ..
എന്‍റെയാത്മാവിന്‍റെ  നോവുകളിലേക്ക് ഒരിറ്റു തീര്‍ത്ഥം ..
എനിക്ക് കൊതി തോന്നുന്നു ..
നേര്‍ത്ത പച്ചകളുടെ പ്രകാശം,
ഇല ഞരമ്പിനു ജീവന്‍റെ മിടിപ്പ്, ..
വസന്തങ്ങളറിയാത്ത   വനാന്തരങ്ങളിലേക്ക്, നിറങ്ങളുടെ
ശലഭം പോലെ ..
എനിക്ക് കൊതി തോന്നുന്നു ,ഒരു മഴ നനയുവാന്‍ ...

അതെങ്കിലും

വേനല്‍ മഴകള്‍
എന്നും ഏകാകിതകള്‍ മാത്രം തരുന്നു ..
എങ്കിലും ഉണരുമ്പോള്‍
ഒരു പച്ചയില,
ഒരു മിന്നാമിന്നി,
കടലാസ്സു തോണി ,
അതെങ്കിലും ..

കടല്‍ വിചാരം

കടലാവുക അത്രയും എളുപ്പമല്ല
ഒരായിരം തിരകളുടെ ചിറകടികള്‍
ചിരമങ്ങനെ ഉള്ളില്‍ പേറുക
എങ്ങുമെങ്ങും നിലക്കാതൊഴുകുക,
അത്രയും എളുപ്പമല്ല..
അതിരില്ലായ്മകളുടെ അനിശ്ചിതത്വങ്ങള്‍ ,
സ്വാതന്ത്ര്യങ്ങള്‍ക്കൊപ്പം
ഒളിച്ചിരിപ്പുണ്ട്..
കടലാവുക അത്രയും എളുപ്പമല്ല
തീരത്തിന്‍റെ വെളുത്ത വിരല്‍തുമ്പു തൊട്ട്
തിരയോരോന്നും മായുമ്പോള്‍
ആരറിയുന്നു,
പിന്മടങ്ങും ഒരൊറ്റതേങ്ങല്‍ ,
കടലോളം പറയുന്ന മൌനം ..
കടലാവുക അത്രയും എളുപ്പമല്ല
ഒരു മണല്‍ത്തരി കൂടി
സ്വന്തമാക്കാതെ ,
സ്വന്തമാക്കലുകളുടെ ചപലതയില്ലാതെ
നിരാസങ്ങളുടെ നോവോര്‍ക്കാതെ..

                                     (2007)

പരിചയം

വഴികള്‍ തോരുന്നിടം
ഇരു ദിശകള്‍..
ആത്മാവിന്‍ ഭാഗമെന്നു ഞാന്‍
മറക്കില്ലെന്ന് കൂട്ടുകാരി ...
എന്നിട്ടിപ്പോള്‍ അവളെന്നോട് പേര് ചോദിക്കുന്നു
പുതിയ പരിചയം .

                                        (1998)

സൗഹൃദങ്ങള്‍..

എനിക്ക്   ഭയമാണ്
സ്നേഹത്തിന്‍റെ  ഈ വകഭേദം..
വേനല്‍ മഴയുടെ സാന്ത്വനം ..
മഴവില്‍ കൊടിയുടെ ചാരുത..
തുണ്ടു കടലാസിലെ സ്നേഹപ്പെയ്ത്   ..
കാത്തു  കാത്തു മടുക്കേണ്ട  മറുകുറിപ്പ്..
മറവിയില്‍ മുങ്ങിത്തപ്പുന്ന പഴയ സുഹൃത്തിന്‍റെ ബദ്ധപ്പാട് ..
പെരുമഴയായി വന്നു വേനല്‍ തന്നു മായുന്നു 
 ശലഭായുസ്സുപോലെ,
 എന്‍റെ സൌഹൃദങ്ങള്‍..

                                  (1997)